يوم وقفت في الطابور

من شهر تقريبا سرت بنك دبي الاسلامي حالي حال الطبقة الكادحة في بلادنا نشوف شو بجى من الرصيد ونرتب أمورنا المالية، المهم رحت عند مكتب الخدمة الفورية وشفت مجموعة من الناس متجمعة على شكل دايرة كل منهم ينتظر الفرصة ليكون أسرع واحد يوصل للموظف ويخلص معاملته ان شاء الله لو يكون توه داخل البنك وغيره واقف ينتظر ساعة.

بكل أدب انتظرت هالسوق ينفض عشان انا اخلص معاملتي بعد، ويوم توه وصل دوري اكلم الموظف الا بذيك المنقبة اتي من خلف الكواليس (ماعرف من وين) وتحطي اوراقها على الكوانتر بطريقة دفرت فيها أوراقي، قلت في خاطري ماعليه يالله رفقا بالقوارير، المهم بعد ذيك السوالف والضحكات مع الموظف طبعا لأنها عفيفة وشريفة ومنقبة على الطابور لكن مع الموظف الوسيم كل شيء يطير، ماعليه سكتنا وقلنا مرة ثانية رفقا بالقوارير، يوم خلصت المنقبة من الحديث العفيف توني بكلم الموظف إلا ما شوفلك الا يد إنمدت جنها مضرب هريس جدامي واسمع واحد يرمس خلفي عربي مكسر، طلع بكستاني طول وعرض، قلنا ماعليه خل يخلص ،هالإشكال ما ينفع وياها شيء إلا قولة اللهم طولك يا روح. . خلص الباكستاني، وتوني بتنفس عشان اكلم الموظف الا ةسمعلك مصر يزقع " انا عندي بس سؤال لو سمحت" وبكل وقاحة دفرني دفرة.

المهم باجي القصة مب لازم أكلمها، بس انا عندي سؤال واحد دايما في خاطري يمر لما نشوف مثل هالمواقف اليومية، متى بنتعلم النظام؟؟؟؟

متى بنتعلم نقول كلمة لو سمحت وشكرا وعفوا، ومن فضلك؟؟؟؟

متى خبروني